Debagoieneko Lanbide Heziketaren Azoka martxoaren 29an eta 30ean egingo da. Aurten betiko lekua berreskuratuko dugu: Arrasaten, Kulturateko klaustroa.
Eskualdeko formazio eskaintza eta bereziki, Lanbide Heziketa ezagutzeko aukera izango da bertan. Debagoieneko Lanbide Heziketako 7 ikastetxeek partehartuko dute; baita Bastida Akademiak, HHI-EPAk, IkasDebagoienak, Lanekik, Mankomunitateak eta udalek ere beren informazio-mahaiak izango dituzte.
ORDUTEGIA:
- MARTXOAK 29, ASTEAZKENA: 8:30-14:30 eta 16:30-18:30
- MARTXOAK 30, OSTEGUNA: 8:30 – 14:30
Ordutegi horretan publiko guztiari zabalik egongo da Azoka.
Ikasle, langabe eta prestakuntza bila dabilen edonorrentzat zabalik dago ekitaldia. Stand-ak bisitatzeko eta zalantzak argitzeko aukera paregabea.
AURTENGO BERRIKUNTZAK
Aurten leku berezia egin nahi diogu Debagoieneko industriari eta eskualdean ekoizten diren produktuekin erakusketa txiki bat jarriko da: “DEBAGOIENEAN EGINA”. Erakusketa kolektibo honekin, honako helburu hauek lortu nahi dira: Eskualdeko enpresa-ehuna sozialki balorizatu eta ezagutaraztea, industriak Debagoienean duen garrantzia azpimarratzea eta perfil teknikoen eta kualifikatuen beharra agerian jartzea. Irailera begira erakusketa osatzea espero da.
ERASMUS + txoko bat ere izango da. Bertan ikusi ahal izango da, Lanbide Heziketa ikasten ari diren ikasleak Europako zein herrialdetan ari diren praktikak egiten.
EGITARAUA:
MARTXOAK 29, ASTEAZKENA
18:30 – SOLASALDIA: “Nik ere Lanbide Heziketa aukeratu dut”
Gurasoei eta Lanbide Heziketan interesa dutenei zuzenduta.
Ikasleen esperientziak ezagutu eta zalantzak argitzeko.
- Lekua: Areto Nagusia (Kulturate, Azoka kalea 1, Arrasate)
- IZEN-EMATEA HEMEN
Hitzaldiaren aurretik, ikastetxeen informazio-mahaiak bisitatu ahal izango dira. Eta solasaldiaren ostean luntxa egongo da.
